fbpx

Blog

ခါရေးအုဒုန်းခေါက်ဆွဲ (Curry Udon)

ဒီအစီအစဉ်ကနေ ခါရေးကို ကြိုက်နှစ်သက်တဲ့ ဂျပန်လူမျိုးတွေအကြား ရေပန်းစားတဲ့ အစားအစာတစ်ခု ဖြစ်တဲ့ ခါရေးအုဒုန်း ဘယ်လိုချက်ပြုတ်ပြင်ဆင်မလဲ ဆိုတာကို တင်ဆက်ပေးမှာ ဖြစ်ပါတယ်။

ခါရေးအုဒုန်း (Curry Udon) ဆိုတာက ခါရေး (Curry) ဟင်းအနံ့အရသာထည့်ထားတဲ့ အုဒုန်းခေါက်ဆွဲ ပါ။ အုမာမိ အရသာပါပြီးသား ခါရေးအနှစ် ကိုသုံးပြီး ချက်ပြုတ်ပါမယ်။


၄ ယောက်စာအတွက်လိုအပ်သောပစ္စည်းများ

  • ကြက်သွန်နီ တစ်ခြမ်း (သို့) ၁၂၀ ဂရမ်
  • မုန်လာဥနီ တစ်ပိုင်း (သို့) ၆၀ ဂရမ်
  • ရှိအိတာကဲ မှို ၂ ပွင့်
  • ဂျပန်ကြက်သွန်မြိတ် ၄ ပုံ ၁ ပုံ
လိုအပ်သော ပါဝင်ပစ္စည်းများ

(ဒါရှိ အရသာရည်အတွက်)

  • ခါဆုအိုဘူရှိ ဒါမှမဟုတ် ဘိုနီတို ငါးခြောက်အဖတ် ၃၀ ဂရမ် (သို့) ၁ ကျပ်သားကျော်ကျော်
  • ရေ ၁၄၀၀ မီလီလီတာ (သို့) ရေ နို့ဆီဘူး ၅ လုံးကျော်ကျော်
  • ရှောယုဂျပန်ပဲငံပြာရည် စားပွဲဇွန်း ၄ဇွန်း
  • ဆား လက်ဖက်ရည်ဇွန်း ၁ ဇွန်း
  • သကြား လက်ဖက်ရည်ဇွန်း ၂ ဇွန်း
  • ခါရေးအမှုန့် စားပွဲဇွန်း တစ်ဝက်
  • ခါတာ့ခုရိခို အာလူးကော်မှုန့် စားပွဲဇွန်း ၃ဇွန်း
  • ပြုတ်ပြီးသား အုဒုန်း ခေါက်ဆွဲ ၆၀၀ ဂရမ် (သို့) ၃၆ ကျပ်သား

Time needed: 30 minutes.

ကြိုတင်ပြင်ဆင်ရန်

  1. ဟင်းရည်ကို ပြင်ပါ။

    ပထမဆုံး ဒါရှိ အရသာရည်ကို လုပ်ပါမယ်။ အိုးတစ်လုံးထဲ ရေထည့်ပြီး ဆူအောင်တည်ပါ။ ရေဆူလာရင် ဘိုနီတို ငါးခြောက်အဖတ်ကို အိုးထဲထည့်ပြီး ၂မိနစ် ပြုတ်ပါ။ ပြီးရင် ဇကာနဲ့ ငါးခြောက်ဖတ်တွေကို ဖယ်ထုတ်လိုက်ပြီး ဒါရှိအရသာရည်ကို သီးခြား အိုး ဒါမှမဟုတ် ပန်းကန်လုံး တစ်လုံးထဲ လောင်းထည့်ထားပါ။

  2. အသီးအရွက်လှီးပါ။

    ကြက်သွန်နီကို သူ့အမြှောင်းအတိုင်း အလျားလိုက် ပါးပါးလှီးပါ။ မုန်လာဥနီကို ဗြက် ၁စင်တီမီတာနဲ့ အရှည် ၄စင်တီမီတာအရွယ် ထောင့်မှန်စတုဂံပုံစံ ပါးပါးလှီးဖြတ်ပါ။ ရှိအိတာကဲ မှိုရဲ့ ရိုးတံကို ပါးပါးလှီးပါ။ ဂျပန်ကြက်သွန်မြိတ်ကို ထောင့်ဖြတ်အတိုင်း ပါးပါးလှီးထားပါ။

  3. ခါရေးပြင်ပါ။

    ခါရေးအမှုန့်ကို ရေ စားပွဲဇွန်း ၁ဇွန်းထည့်ပြီး ရောမွှေပါ။ အာလူးကော်မှုန့်ကိုတော့ ရေ စားပွဲဇွန်း ၃ဇွန်းထည့်ပြီး နှံ့စပ်အောင် သေသေချာချာ မွှေပေးပါ။

  4. ဟင်းချိုရည်ကို တည်ပါ။

    လတ်ဆတ်တဲ့ ဒါရှိအရသာရည် ချက်ဖို့ သကြား၊ ဂျပန်ရှောယုပဲငံပြာရည်နဲ့ ဆားကို ထည့်ပါမယ်။ ကြက်သွန်မြိတ်က လွဲပြီး ကျန်တဲ့ ဟင်းသီးဟင်းရွက် အားလုံးကိုအိုးထဲထည့်ပြီး အိုးကို မီးအပူစပေးပါမယ်။ ဟင်းချို ဆူလာတဲ့အခါ နောက်ထပ် ၅မိနစ် ဆက်တည်ရပါမယ်။ ဟင်းချိုချက်နေတဲ့အချိန်မှာ တက်လာတဲ့ အမြှုပ်လေးတွေကို ခပ်ထုတ်ပေးပါ။

  5. အသီးအရွက်တွေထည့်ပါ။

    ဟင်းသီးဟင်းရွက်တွေ ကျက်သွားလောက်ချိန်မှာ ရေနဲ့ဖျော်ထားတဲ့ ခါရေးအနှစ်ကို ထည့်ပါ။ အဲဒီနောက် ပါးပါးလှီးထားတဲ့ ကြက်သွန်မြိတ်တွေကိုထည့်ပြီး မီးပိတ်လိုက်ပါ။

  6. ကော်မှုန့်ထည့်ပါ။

    အာလူးကော်မှုန့်ကို နောက်တစ်ကြိမ် ထပ်ပြီး သေသေချာချာ မွှေပါမယ်။ ဟင်းချိုရည်ကို ယောက်ချိုနဲ့မွှေနေတုန်းမှာ အဲဒီအာလူးကော်မှုန့်ကို ထည့်လိုက်ပါ။

  7. မီးအေးအေးနဲ့ တည်ပါ။

    မီးပြန်ပေးပြီး ဟင်းချိုရည်ကို ဆက်မွှေပေးပါ။ ဟင်းချိုရည် ဆူပွက်လာရင် ပြုတ်ပြီးသား အုဒုန်းခေါက်ဆွဲကို ထည့်ပါမယ်။ ဟင်းချိုထပ်ဆူလာပြီဆိုရင်တော့ မီးပိတ်လို့ရပါပြီ။

  8. သုံးဆောင်လို့ရပါပြီ။

    ဒုံဘူရီ ဒါမှမဟုတ် ပန်းကန်လုံးအကြီးထဲမှာ အုဒုန်းခေါက်ဆွဲဖတ်ကိုထည့်ပြီး အပေါ်က ဟင်းချိုရည်နဲ့ဟင်းသီးဟင်းရွက်တွေ ထည့်ပြီး သုံးဆောင်နိုင်ပါပြီ။

ဆူရှီထမင်းလိပ် (Hosomaki)

ဂျပန်နိုင်ငံရဲ့ တမူထူးခြားတဲ့ အစားအစာဖြစ်တဲ့ ဆူရှီဟာ အရွယ်အစားအရရော၊ အမျိုးအစားအရပါ အမျိုးမျိုး ရှိပါတယ်။ ဒီကနေ့တော့ အိမ်တွေမှာ မကြာခဏ လုပ်စားလေ့ရှိတဲ့ ဟိုစိုမာ့ကိ ထမင်းလိပ်ကို ဘယ်လို လုပ်ရတယ်ဆိုတာကို ပြသပေးသွားပါမယ်။

ဟိုစိုမာ့ကိဆိုတာ ရှာလကာရည်နဲ့ နယ်ထားတဲ့ ထမင်းကို ရေညှိပြားပေါ်မှာ ဖြန့်ခင်းပြီး ကျစ်နေအောင် လိပ်ထားတဲ့ ဆူရှီပါ။ လိပ် ပြီးတော့မှ ၃ စင်တီမီတာ အရှည် အပိုင်းလေးတွေ လှီးရပါမယ်။


၄ယောက်စာအတွက်လိုအပ်သောပစ္စည်းများ

(စူရှီ ထမင်း)

  • ထမင်း ၃၀၀ ဂ၇မ် (၁၈ ကျပ်သား)
  • ရေ ၄၀၀ မီလီမီတာ (နို့ဆီဘူး ၁ ဘူးခွဲကျော်ကျော်)

(ဆူရှီထမင်းချက်ရန် လိုအပ်သောပစ္စည်း)

  • ရှာလကာရည် စားပွဲဇွန်း ၃ ဇွန်း
  • သကြား စားပွဲဇွန်း ၂ ဇွန်း
  • ဆား လက်ဖက်ရည်ဇွန်း ၁ ဇွန်း
လိုအပ်သော ပါဝင်ပစ္စည်းများ

(ဂျပန် ကြက်ဥခေါက်ကြော်)

  • ကြက်ဥ ၁ လုံး
  • သကြား စားပွဲဇွန်း တစ်ဝက်
  • ဆားအနည်းငယ်
  • ရေ လက်ဖက်ရည်ဇွန်း ၁ ဇွန်း

(တူနာငါးမွှေ ပြုလုပ်ရန်)

  • စည်သွတ်တူနာငါးဘူး ၃၀ ဂရမ် (၂ ကျပ်သားခန့်)
  • သကြား စားပွဲဇွန်း တစ်ဝက်
  • ပဲငံပြာရည် လက်ဖက်ရည်ဇွန်း ၁ ဇွန်း
  • ရေ စားပွဲဇွန်း တစ်ဝက်
  • ကင်ပြီးသား နိုရိရေညှိ ၁၀ ခု (အလျား ၂၀ စင်တီမီတာ၊ အနံ ၁၀ စင်တီမီတာ)
  • သခွားသီး တစ်ခြမ်း
  • တူနာငါးစိမ်းအလွှာ ၆၀ ဂရမ် (၄ ကျပ်သားခန့်)
  • အူမဲဘိုးရှိ ၁ လုံး (ရှာလကာရည်စိမ်ထားတဲ့ မက်မန်းသီး)
  • ဝါ့စာ့ဘိ
  • နှမ်းဖြူ
  • ဆီ

ပြုလုပ်ရန်ကြာချိန် 30 minutes.

ကြိုတင်ပြင်ဆင်ရန်

  1. ဆူရှီထမင်း ရအောင် နယ်ပါ။

    အရင်ဆုံး ဆူရှီထမင်း ဒါမှမဟုတ် ရှာလကာရည်နယ်ထားတဲ့ ထမင်းကို ပြင်ပါမယ်။ ဆူရှီ ထမင်းအတွက် ရှာလကာရည်ကတော့ ဆန်ရှာလကာရည်၊ သကြားနဲ့ ဆားကို ရောမွှေရင်ရပါပြီ။ ပြီးရင် ချက်ပြီးခါစ ထမင်းပေါ်ကို စက်ဝိုင်းပုံစံ‌ ဆူရီရှာလကာရည်ကို ဆမ်းလိုက်ပါ။ ၁ မိနစ် ၂ မိနစ်လောက်အတွင်းမှာ ထမင်းခဲတွေကို တစ်စိစီ ဖြစ်သွားအောင် ညင်ညင်သာသာလေး မြန်မြန်မွှေရင်း ထမင်းထဲကို ရှလကာရည်ဝင်အောင်ထည့်ပါ။ ထမင်းအငွေ့တွေ ပျယ်ပြီး အပူဓာတ်ပျောက်သွားတဲ့အထိ ထမင်းကို ပန်ကာလေနဲ့ အအေးခံထားပါ။ ထမင်းကို အထက်အောက် လှန်ပြီး အပူငွေ့ လုံးဝ မရှိတော့အောင် ပန်ကာနဲ့ နောက်တစ်ကြိမ် အအေးထပ်ခံပါ။ ပြီးရင် ထမင်းကို ခြောက်မသွားအောင် ပလတ်စတစ် အပါးစနဲ့ ထမင်းတွေကို ဖုံးအုပ်ထားရပါမယ်။

  2. ကြက်ဥခေါက်ကြော်ပါ။

    ကြက်ဥခေါက်ကြော်လုပ်ဖို့အတွက် ပန်းကန်လုံးတစ်လုံးထဲမှာ ကြက်ဥကို ဖောက်ထည့်လိုက်ပြီး၊ သကြား၊ ဆားနဲ့ ရေအားလုံးပေါင်းထည့်ပြီး သမအောင် မွှေပါ။ ပြီးရင် လက်ကိုင်ပါတဲ့ ဒယ်အိုးထဲမှာ ဆီပါးပါးလေးသုတ်ပြီး အိုးကို အပူပေးလိုက်ပါ။ အိုးပူလာရင် ခေါက်ထားတဲ့ ကြက်ဥကို တစ်ဝက်လောင်းထည့်လိုက်ပြီး အိုးအောက်ခြေတစ်ခုလုံး ပြန့်သွားအောင် အိုးကိုစောင်းပြီး လှည့်ပေးပါ။ ပြီးရင် အပူချိန်လျှော့ပြီးတော့ ကြော်ပါ။

  3. ကြက်ဥလိပ်ကို လှီးပါ။

    ကြက်ဥကို အောက်ကနေ ကော်ယူလို့ရလောက်အောင် ကျက်သွားတဲ့အချိန်မှာ ဂေါ်နဲ့ပါးပါးလေး လိပ်ယူလိုက်ပါ။ ကြက်ဥကို လိပ်ယူပြီးသွားရင် အိုးထဲကို ဆီထပ်သုတ်လိုက်ပြီး ကြက်ဥခေါက်ထားပြီးသား ကျန်တဲ့ တစ်ဝက်ကို လောင်းထည့်လိုက်ပါ။ ကြက်ဥကြော်ကို ကိုယ့်ဘက်ကို မြန်မြန်လေး လိပ်ယူရပါမယ်။ လိပ်ထားတဲ့ ကြက်ဥကို စဉ်းတီတုံးလိုမျိုး မျက်နှာပြင်ပြားပြားတစ်ခုပေါ်မှာ တင်လိုက်ပြီး ၁ စင်တီမီတာ စတုရန်းအရှည် အလိပ်လေး ဖြစ်အောင် လှီးရပါမယ်။

  4. ငါးမွှေလုပ်မယ်။

    တူနာ စိုဘိုရိုလို့ ခေါ်တဲ့ ငါးမွှေလုပ်ဖို့အတွက် အိုးတစ်လုံးထဲကို သကြား၊ ပဲငံပြာရည်နဲ့ ရေ ရောထည့်လိုက်ပါ။ ပြီးရင် တူနာငါးမှာရှိတဲ့ အရည်ဓာတ်တွေကို စက္ကူလက်ကိုင်ပဝါကိုသုံးပြီး စုပ်ယူ ဖယ်ရှားပါ။ အားလုံးရောထားတဲ့ အဲဒီတူနာ ငါး အိုးကို အပူချိန် အတော်လောက်နဲ့ တည်ပြီး အစိုဓာတ်တွေအားလုံး အငွေ့ပျံသွားအောင် စောင့်ရင်း မွှေပေးပါ။

  5. လှီးဖြတ်ပြင်ဆင်မယ်။

    သခွားသီးကိုလည်း ၁ စင်တီမီတာ စတုရန်းပုံ အ‌ချောင်းလေးတွေ လှီးထားပြီး တူနာငါးအသားစိမ်း စာရှီမိအလွှာလေးတွေကိုလည်း ၁ စင်တီမီတာ အထူလှီးထားပါ။ မက်မန်းသီးကိုလည်း အစေ့ထုတ်ထားပြီး လက်ချောင်းလေးတွေနဲ့ အပိုင်းပိုင်းလေးတွေ ဖြစ်အောင် လုပ်ထားပါ။ (ကိုယ်သုံးမယ့် နိုရိ ရေညှိဖတ်က အပြားကြီး ဖြစ်နေမယ်ဆိုရင် တစ်ဝက်ဖြစ်အောင် ပိုင်းဖြတ်ထားပါ။)

  6. လိပ်ဖို့ ပြင်ဆင်မယ်။

    ဂျပန်လို မာခီဆုလို့ ခေါ်တဲ့ ဝါးယင်းလိပ် သေးသေးလေးကို မျက်နှာပြင်ညီတဲ့ပေါ်မှာ ဖြန့်ခင်းပြီး ဆူရှီလိပ်လုပ်ဖို့ အဲဒီဝါးယင်းလိပ်လေးရဲ့ တစ်ဝက်လောက်ကနေ နိုရိရေညှိဖတ်ကို ခင်းထားရပါမယ်။ ဝါးယင်းလိပ် မရှိဘူးဆိုရင် အဲဒီအစား ပလတ်စတစ်အစကို သုံးပြီး လိပ်လို့ရပါတယ်။

  7. လှပအောင် လိပ်မယ်။

    ပန်းကန်လုံးတစ်လုံးထဲမှာ ရေထည့်ပြီး ရေစိုလက်ကိုင်ပဝါတစ်ခု ပြင်ဆင်ထားပါ။ ဆူရှီထမင်းလိပ် ၁၀ ခု လုပ်ပါမယ်။ လက်ကို ရေထဲမှာနှစ်ပြီး ရေစိုဝတ်နဲ့ သုတ်ရပါမယ်။ ထမင်းလိပ် တစ်လိပ်လုပ်ဖို့အတွက် ဆူရှီထမင်း ၇၀ ဂရမ် ကို ခပ်ပြီး ရေညှိဖတ်ပေါ်မှာ ညီညီလေး ဖြန့်ခင်းလိုက်ပါ။ တစ်ဘက်အခြမ်းကနိုရိကို ၂ စင်တီမီတာလောက် နေရာ ချန်ထားပါ။ ထည့်ရမယ့်ပစ္စည်းတွေကို ထမင်းရဲ့ အလယ်တည့်တည့်မှာ ဖြောင့်တန်းနေအောင် စီပြီး ထည့်ရပါမယ်။

  8. လိပ်နည်း

    လိပ်တဲ့အခါမှာ ကိုယ့်ရဲ့ လက်မနှစ်ဖက်နဲ့ ကိုယ့်ဘက်ခြမ်းက ဝါးယင်းလိပ်ကို မပြီး ယူရပါမယ်။ ကျန်တဲ့ လက်ချောင်းတွေက ပါဝင်ပစ္စည်းတွေကို ထိန်းကိုင်ထားရင်း ဝါးယင်းလိပ်လေးကို ကိုယ့်ဘက်က နိုရိအပြား အစွန်းနဲ့ တစ်ဖက်ကနိုရိရေညှိပြား အစွန်းကို ထပ်သွားအောင် ခေါက်လိုက်ပါ။ ခေါက်လိုက်တဲ့အခါ ပါဝင်ပစ္စည်းတွေက ထမင်းနဲ့ တစ်ပါတည်းပါလာအောင်ထိမ်းကိုင်ပြီး နိုရိရေညှိပြား အနားနှစ်ဖက်ညီအောင် ထပ်ရပါမယ်။ ပြီးရင် ခေါက်ထားတဲ့ ဝါးယင်းလိပ်ကို ညာဘက်လက်နဲ့ ထိမ်းထားရင်း ဘယ်ဘက်လက်နဲ့ ကိုယ့်ရဲ့ တစ်ခြား တစ်ဖက်က ဝါးယင်းလိပ်ကို ကိုယ်နဲ့ဆန့်ကျင်ဘက်ကို ဆွဲထုတ်ရပါမယ်။

  9. အဆာပလာတွေ

    ဝါးယင်းလိပ်ကို ဖွင့်လိုက်ပြီး ဆူရှီထမင်းလိပ်တစ်ခုလုံးကို နိုရိရေညှိအပြား ဖုံးမနေတဲ့နေရာကို သေချာအထဲဝင်အောင် ထပ်လိပ်ပါ။ သခွားသီး၊ ကြက်ဥခေါက်ကြော်၊ နှမ်းနဲ့ မက်မန်းသီးဆားစိမ်၊ ဝါ့စာ့ဘိထည့်ထားတဲ့ တူနာငါးစိမ်းနဲ့ စိုဘိုရို တူနာငါးမွှေ ၅ မျိုးကို သုံးပြီး အစာတစ်မျိုးကို ဟိုစိုမာကိ ထမင်းလိပ် ၂ ခုစီ ပြုလုပ်လို့ ရပါတယ်။

  10. သုံးဆောင်လို့ရပါပြီ။

    လိပ်ပြီးရင် ၃ စင်တီမီတာ အပိုင်းလေးတွေ လှီးဖြတ်ပါ။ မလှီးခင်မှာ ဓားကို အဝတ်စိုနဲ့ တစ်ကြိမ် သုတ်ရပါမယ်။ လှီးပြီးရင် ထမင်းလိပ်တွေကို ဘူးတစ်ခု ဒါမှမဟုတ် ပန်းကန်ပြား တစ်ခုပေါ်မှာ စီပြီး ထည့်လိုက်ပါ။

စုကိယာ့ကိ (Sukiyaki)

ဒီတစ်ပတ်အစီအစဉ်မှာတော့ ဂျပန်မှာ လူကြိုက်များတဲ့ အစားအစာတစ်မျိုးဖြစ်တဲ့ “စုကိယာ့ကိ” (Sukiyaki) ဟင်းလျာ ချက်ပါမယ်။

စုကိယာ့ကိ ဆိုတာ အထူးသဖြင့် ထူးထူးခြားခြားအထိမ်းအမှတ်ပွဲတွေဆိုရင် အိမ်တွေမှာ မကြာခဏ ချက်စားလေ့ရှိတဲ့ ဟော့ပေါ့ဟင်းလျာ တစ်မျိုးပါ။ ဒီဟင်းလျာကို ပုံမှန်အားဖြင့် အမဲသားနဲ့ ချက်လေ့ရှိပေမယ့် ဒီနေ့တော့ အမဲသားအစား ကြက်သားကို အသုံးပြု ချက်ပြုတ်သွားမှာပါ။


၄ယောက်စာအတွက်လိုအပ်သောပစ္စည်းများ

  • ၃၀၀ ဂရမ် ရှိတဲ့ အရိုးထွင်ပြီးသား ကြက်ပေါင် ၁ ပေါင် (၁၈ ကျပ်သား)
  • ဂျပန်ကြက်သွန်မြိတ် ၂ ပင်
  • ရှီအိတာကဲမှို ၄ ပွင့်
  • ပဲပြား ၃၀၀ ဂရမ် ၁ တုံး (၁၈ ကျပ်သား)
  • ရှီရာ့တာ့ကိလို့ခေါ်တဲ့ ဝဥနဲ့ လုပ်ထားတဲ့ ခေါက်ဆွဲ ၂၀၀ ဂရမ် ၁ ထုပ် (၁၂ ကျပ်သား)
ပါဝင်ပစ္စည်းများ
  • ကြက်ဥ ၄ လုံး (ဝါရိရှီတာ့ အချိုရည်အတွက်)
  • ပဲငံပြာရည် စားပွဲဇွန်း ၄ ဇွန်း (၆၀ မီလီလီတာ)
  • သကြား ၃၀ ဂရမ် (၂ ကျပ်သားခန့်)
  • ရေ ၂၀၀ မီလီလီတာ (နို့ဆီဘူး တစ်ဘူး မရှိတရှိ)

ပြုလုပ်ရန်ကြာမြင့်ချိန် 20 minutes.

ကြိုတင်ပြင်ဆင်ရန်

  1. ဝါရိရှိတာ့ ကိုပြင်ဆင်မယ်။

    ပထမဆုံး ဝါရိရှိတာ့ လို့ခေါ်တဲ့ စုကိယာ့ကိ အချိုရည် လုပ်ပါမယ်။ ပဲငံပြာရည်၊ သကြားနဲ့ ရေကို ဒယ်အိုးတစ်လုံးထဲမှာ ထည့်မယ်။ ပြီးရင် အပူပေးပြီးတော့ မွှေမယ်။ သကြားပျော်သွားပြီဆိုရင် မီးပိတ်လိုက်ပါမယ်။

  2. အသားနဲ့ အသီးအရွက်တွေကို လှီးမယ်။

    နောက်ပြီးတော့ ဟင်းလျာထဲ ထည့်မယ့် ပစ္စည်းတွေကို လှီးပါမယ်။ ကြက်သားက အဆီပိုတွေကို ဓားနဲ့ လှီးထုတ်ရပါမယ်။ အဲဒီအဆီကို ဟင်းချက်ဖို့အတွက် နောက်ပိုင်းမှာ ပြန်သုံးဖို့ သိမ်းထားပါ။ ပြီးရင် စဉ်းနီတုံးပေါ်မှာ ကြက်သားရဲ့ အရေပြားကို အောက်ဘက်ကထားပြီးတော့ ဖြန့်ခင်းထားပြီး အသားပါးတဲ့ အလယ်နေရာလောက်ကနေ တစ်ဝက် လှီးလိုက်မယ်။ ပြီးရင် အဲဒီကြက်သားကို အလျားထားပြီး ထောင့်ဖြတ် စောင်းစောင်းလေးနဲ့ ပါးပါးလေး လှီးထားပါမယ်။ ကြက်သားအလွှာတစ်ခုချင်းစီကို ၅ မီလီမီတာ အထူလောက်လှီးရင် အတော်ပါပဲ။

  3. ပဲပြားနဲ့ ကြက်သွန်မြိတ်လေးတွေကို လှီးမယ်။

    ဂျပန်ကြက်သွန်မြိတ်ကို ၃ စင်တီမီတာအရှည်လေးတွေ လှီးပါမယ်။ ပြီးရင် ရှီအိတာကဲ မှိုတွေကို ရိုးတံဖြုတ်ပြီး မှိုပွင့်ကို ဓားနဲ့ တစ်ဝက်လောက်ကနေ ထောင့်ဖြတ်ပုံစံလေးတွေ လှီးထားပါမယ်။ ပဲပြားကို ၃ စင်တီမီတာ လောက်တုံးပြီး ထု က ၂ စင်တီမီတာလောက်အရွယ် အတုံးသေးသေးလေးတွေ လှီးထားပါ။

  4. ပြုတ်မယ်။

    ဆန်ကာတစ်ခုထဲမှာ ရှီရာ့တာကိလို့ခေါ်တဲ့ ဝဥနဲ့ လုပ်ထားတဲ့ ခေါက်ဆွဲကို ရေစစ်ထားပြီး ၁၀ စင်တီမီတာ အရှည်လောက် ဖြတ်ထားပါ။ ပြီးရင် အိုးတစ်လုံးထဲမှာ ရေနွေးဆူအောင်တည်ပြီး ရှီရာတာ့ကီကို ၂ မိနစ်လောက် ထည့်ပြုတ်ပါ။ ပြုတ်ပြီးရင် ရေစစ်ထားပါ။

  5. မီးဖိုပြင်ဆင်မယ်။

    ထမင်းစားပွဲပေါ်မှာ စားပွဲတင် ဂတ်စ် မီးဖိုဆင်ထားပါ။ အောက်ခြေပြားတဲ့ ဒယ်အိုး ဒါမှမဟုတ်လည်း လက်ကိုင်ပါတဲ့ ဒယ်အိုးကို အဲဒီဂတ်စ်မီးဖိုပေါ်မှာ တင်ပြီး အပူပေးပါမယ်။ ဒယ်အိုးထဲကို စောစောက ဖယ်ထားတဲ့ ကြက်ဆီအနည်းငယ် ထည့်လိုက်ပါမယ်။ တကယ်လို့ ကြက်ဆီမရှိရင်လည်း အဲဒီအစား ဟင်းရွက်ဆီကို သုံးနိုင်ပါတယ်။ ကြက်ဆီက အပူကြောင့် ပျော်သွားပြီ ဆိုရင် အိုးမျက်နှာပြင် တစ်ခုလုံး ဖြန့်ပါမယ်။ အဲဒီနောက် အိုးထဲကို ကြက်သွန်မြိတ် တစ်ဝက်လောက် ထည့်လိုက်ပါမယ်။

  6. စချက်မယ်။

    ကြက်သွန်မြိတ်က အညိုရောင် ဖျော့ဖျော့လေး ဖြစ်လာပြီဆိုရင် ကြက်ဆီတွေကို ခပ်ထားပြီး မီးပိတ်လိုက်ပါ။ ကြက်သွန်မြိတ်ကို အိုးတစ်နေရာမှာ စုလိုက်ပြီး ရှီအိတာကဲမှို၊ ပဲပြားနဲ့ ဝ ဥ ခေါက်ဆွဲတွေကို သူ့အစုလိုက်နဲ့ သူ အိုးထဲမှာ စီထည့်လိုက်ပါမယ်။ ပြီးရင်တော့ အဲဒီဟင်းချက်ပစ္စည်းတွေရဲ့ တစ်ဝက်လောက်မြုပ်တဲ့ အထိ ဝါရိရှိတာ့ အချိုရည်ကို လောင်းထည့်ပါ။ အပူချိန်အတော်လောက်နဲ့ ချက်ပါမယ်။

  7. အသားလွှာတွေထည့်မယ်။

    အချိုရည် ပွက်လာပြီဆိုရင် အပူချိန်ကို လျှော့လိုက်တာမျိုးမဟုတ်ဘဲ သေချာစောင့်ကြည့်ရင်း ကြက်သားလွှာတွေကို တစ်ခုချင်းစီ ထည့်ပါမယ်။ ကြက်သားတစ်ဝက်လောက် ဒယ်အိုးထဲ ထည့်ပြီးပြီဆိုရင် ၄ မိနစ်ကနေ ၅ မိနစ်အထိ ချက်ပါ။

  8. သုံးဆောင်နိုင်ပါပြီ။

    တစ်ယောက်စာ ပန်းကန်လုံးတစ်လုံးစီမှာ ကြက်ဥတစ်လုံးစီ ခေါက်ထည့်ပြီး ပြင်ဆင်ထားပါမယ်။ ပြီးရင် ဒယ်အိုးထဲက ချက်ပြီးသား အသားနဲ့ ဟင်းသီးဟင်းရွက်တွေကို ကြက်ဥ အစိမ်းခေါက်ထားတာနဲ့ တို့ပြီးစားလို့ရပါတယ်။ ကြက်ဥအစိမ်းနဲ့ စား မစားကတော့ ရွေးချယ်လို့ ရပါတယ်။ ကြက်ဥ လတ်လတ်ဆတ်ဆတ် မရတာမျိုး ဒါမှမဟုတ် ကြက်ဥအစိမ်း မကြိုက်တာမျိုးဆိုရင် ဒီဟင်းလျာကို ကြက်ဥ မပါဘဲနဲ့စားနိုင်ပါတယ်။ ကျက်ပြီးသား အသားတွေ ဟင်းသီးဟင်းရွက်တွေ စားလိုက်လို့ နည်းလာရင် နောက်ထပ် အသားတွေ ဟင်းသီးဟင်းရွက်တွေနဲ့ ဝါရိရှီတာ့ အချိုရည် ထပ်ထည့်ပြီး ချက်နေရင်းနဲ့ စားလို့ရပါတယ်။

Dago-jiru လို့ခေါ်တဲ့ အရေးပေါ်အစားအစာ

ဂျပန်နိုင်ငံမှာ သဘာဝဘေးအန္တရာယ်ကျရောက်တဲ့အချိန်မှာ ဒုက္ခရောက်နေကြတဲ့ လူတွေကို အစားအစာဝေငှဖို့လိုအပ်တဲ့အတွက် အစားအစာတွေကို အများကြီး အတူတကွ ချက်ပြုတ်ကြပါတယ်။

အဲဒီလို ချက်ပြုတ်တာကို ဂျပန်လို “takidashi” လို့ ခေါ်ပါတယ်။ ဒီအစီအစဉ်ကနေ လူကြိုက်များတဲ့ takidashi ဟင်း dago-jiru ဂျုံလုံးစွပ်ပြုတ်ကို ဘယ်လိုချက်ပြုတ်မလဲဆိုတာ ပြောပြ သွားမှာပါ။


၄ ယောက်စာအတွက်လိုအပ်သောပစ္စည်းများ

  • ၁၂၀၀ မီလီလီတာ ဒါးရှိလို့ ခေါ်တဲ့ အသီးအရွက်ပြုတ်ဟင်းချိုအတွက် လိုအပ်တဲ့ပစ္စည်းများ
  • ရှီအိတာကဲ မှိုခြောက်မွှေး ၂ ပွင့်
  • မုန်လာဥဖြူ ၁၅၀ ဂရမ် (၉ ကျပ်သား)
  • မုန်လာဥနီ ၁၀၀ ဂရမ် (သို့) ဥ သေး တစ်ဥ (၆ ကျပ်သား)
  • ဘာဒေါ့လို့ခေါ်တဲ့ ဂေါ်ဘိုးအမြစ် ၅၀ ဂရမ် (သို့) ၂ ပုံ ၁ ပုံ (၃ ကျပ်သား)
  • ကြက်သွန်မြိတ် အသေး ၂ ပင်
ပါဝင်ပစ္စည်းများ

(ဒန်ဂို ဂျုံလုံးလုပ်ဖို့အတွက်)

  • ဂျုံ ၁၀၀ ဂရမ် (၆ ကျပ်သား)
  • ဆားအနည်းငယ်
  • ရေနွေး ၅၀ မီလီလီတာ (ရေနို့ဆီဘူး ၄ ပုံ ၁ ပုံ မရှိတရှိ)

Time needed: 30 minutes.

ကြိုတင်ပြင်ဆင်ရန်

  1. မှိုကို‌ ရေစိမ်ပါ။

    ပထမဆုံး ရေနွေး ၂၀၀ မီလီလီတာ (ရေနို့ဆီဘူး ၁ ဘူးမရှိတရှိ) ထဲမှာ ရှီအိတာကဲ မှိုခြောက်ကို ပြန်စိုလာအောင် ၁ နာရီကနေ ၂ နာရီထိ စိမ်ထားရပါမယ်။

    တကယ်လို့ အချိန်ရမယ်ဆိုရင်တော့ မှိုတွေကို ရေအေးနဲ့ တစ်ည အရင် စိမ်ထားပါ။ အဲဒီလို ရေစိမ်လိုက်တဲ့အတွက် မှိုတွေက အိဖောင်းလာပါလိမ့်မယ်။

  2. ဂျုံနှပ်ပါ။

    ဂျုံလုံးစွပ်ပြုတ်လုပ်ဖို့အတွက် ဇလုံကြီးတစ်လုံးထဲမှာ ဂျုံတွေကို ထည့်ထားပါ။ နောက်ထပ် ဇလုံတစ်ခုထဲမှာ ဆားအနည်းငယ် (၁ ပွင့် ၂ ပွင့်လောက်) ထည့်ထားပြီး အပူချိန် ၃၈ ဒီဂရီ ဆဲလ်စီးယက်စ် ရှိတဲ့ ရေနွေးကို လောင်းထည့်ပါ။

    ပြီးရင် မွှေလိုက်ပြီး ဆားအရည်ပျော်သွားတဲ့အခါ အဲဒီရေနွေးတွေကို ဂျုံထည့်ထားတဲ့ ဇလုံထဲကို လောင်းထည့်ပြီး တူနဲ့ သမအောင် မွှေပါ။ မွှေလို့ ရေနွေးနဲ့ ဂျုံက အတော်လေး သမ လောက်ပြီဆိုရင် လက်နဲ့ နယ်ပေးရပါမယ်။

    နယ်ပြီးရင် အဲဒီဂျုံထည့်ထားတဲ့ ဇလုံကို မီးဖိုချောင်သုံး ပလတ်စတစ် အကြည်နဲ့ ဒါမှမဟုတ် ရေစို ပုဝါတစ်ခုနဲ့ အုပ်ထားပြီး ဂျုံ မုန့်ညက်ကို ဒီအတိုင်း မိနစ် ၃၀ ထားထား ရပါမယ်။

  3. ဂေါ်ဘိုးအမြစ်များကို လှီးသင်ပါ။

    နောက်ထပ်လုပ်ရမှာကတော့ ဘာဒေါ့လို့ခေါ်တဲ့ ဂေါ်ဘိုးအမြစ်အပေါ်ယံက အမွှေးလေးတွေကို ဓားရဲ့ အသွားဘက်ကမဟုတ်တဲ့ ဘက်နဲ့ ခြစ်ချပါ။ မျက်နှာပြင် အဖြူရောင် ပေါ်လာပြီဆိုရင် ရေဆေးလိုက်ပါ။

    ပြီးရင် ဂေါ်ဘိုးအမြစ်ရဲ့ ထိပ်ဘက်ကို ၃ စင်တီမီတာကနေ ၄ စင်တီမီတာလောက် အရှည်ရှိတဲ့ အချပ်လေးတွေရအောင် ခဲတံချွန်သလိုမျိုး ပါးပါး လှီးလိုက်ပါမယ်။ လှီးပြီးတာနဲ့ ဂေါ်ဘိုးအမြစ်တွေကို ရေဇလုံထဲမှာ ချက်ချင်း စိမ်ထားရပါမယ်။

  4. ဟင်းသီးဟင်းရွက်များလှီးပါ။

    မုန်လာဥနီနဲ့ မုန်လာဥဖြူကိုတော့ အခွံသင်ပါမယ်။ ပြီးရင် အရှည်အတိုင်း တစ်ဝက်စီ ပိုင်းလိုက်ပြီး၊ ပိုင်းထားတဲ့ အပိုင်းတွေကို တစ်ဝက်ပြန်ပြီး အတုံးလေးတွေလှီးမယ်။

    မုန်လာဥနီကို ၄ မီလီမီတာနဲ့ မုန်လာဥဖြူကို ၅ မီလီမီတာ အရွယ်လှီးရပါမယ်။ ရှီအိတာကဲ မှိုကိုတော့ မှိုအရိုးကို နုပ်နုပ်စင်းပြီး မှိုပွင့်ချပ်ကိုတော့ အချပ်လေးတွေလှီးထားပါမယ်။ မှိုစိမ်ထားတဲ့ အရည်တွေကို နောက်ပိုင်းပြန်သုံးမှာဖြစ်တဲ့အတွက် သိမ်းထားရပါမယ်။

    ကြက်သွန်မြိတ်ကို အလျားလိုက် အရွယ်ညီညီ ၄ ပိုင်း ပိုင်းပြီး အဲဒီ ၄ ပိုင်းကို စုပြီး ပါးပါးလေး လှီးထားပါမယ်။

  5. ဟင်းရည်တည်ပါ။

    အိုးတစ်လုံးထဲကို ဒါးရှိစွပ်ပြုတ်ရည်နဲ့ ရှီအိတာကဲ မှိုစိမ်ထားတဲ့ အရည် ၁၀၀ မီလီလီတာ (ရေနို့ဆီဘူး တစ်ဝက် မရှိတရှိ) ထည့်လိုက်ပါမယ်။ အဲဒီထဲကို လှီးထားတဲ့ မုန်လာဥဖြူ၊ မုန်လာဥနီနဲ့ ရှီအိတာကဲမှိုအပြင် ရေဆေးထားတဲ့ ဂေါ်ဘိုးအမြစ်အချပ်လေးတွေကို ထည့်ပါမယ်။

    အားလုံးထည့်ပြီးသွားပြီ ဆိုရင်တော့ မီးအနေတော်နဲ့ အိုးပူလာအောင် တည်လိုက်ပါမယ်။ ရေနွေးဆူလာပြီဆိုရင်တော့ မီးလျှော့လိုက်ပြီး အိုးအပေါ်ကို တက်လာတဲ့ အမြှုပ်တွေကို အပေါ်ယံလျှပ်ပြီး ခပ်ထုတ်ရပါမယ်။

  6. ဂျုံလုံးတွေထည့်ပါမယ်။

    နောက်တစ်ဆင့်ကတော့ dango ဂျုံလုံးလေးတွေ လုပ်ပါမယ်။ နှပ်ထားတဲ့ ဂျုံမုန့်ညက်ကို လက်နဲ့ ဖဲ့ပြီး စပျစ်သီးတစ်လုံးစာ အရွယ်အလုံးလေးတွေကို လုံးပြီး အလယ်ကနေ လက်မနဲ့ ပြားသွားအောင်ဖိပြီးမှ ဟင်းရည်အိုးအလယ် တည့်တည့်ကို ထည့်ပါမယ်။

    အကျက်မြန်အောင်လို့ ဂျုံလုံးတွေကို အလယ်ကနေ ဖိပြီး အဝိုင်းပြားဖြစ်အောင်လုပ်ဖို့ မမေ့ပါနဲ့နော်။ ပြီးရင် အိုးကို အဖုံး ဖုံးထားလိုက်ပြီး မိနစ် ၃၀ လောက် မီးအေးအေးနဲ့ ဆူအောင်တည်ထားရပါမယ်။

  7. ကျက်မကျက် စစ်ဆေးပါ။

    တည်ထားတာ မိနစ် ၃၀ ကြာပြီးတဲ့နောက် dango ဂျုံလုံးတွေကို ဆယ်ယူလိုက်ပြီး ကျက် မကျက် အတွင်းထဲက အရောင်ကို ကြည့်ရပါမယ်။

    အချပ်ကလေး လှီးပြီး ကြည့်ပါ။ အတွင်းထဲက လုံးဝ အကြည်ရောင်ဖြစ်နေပြီဆိုရင်တော့ ကျက်ပါပြီ မီးပိတ်လိုက်ပါ။

  8. သုံးဆောင်နိုင်ပါပြီ။

    မီဆိုပဲနှစ်ကို ညက်ညက်ကလေးဖြစ်အောင် လက်ကိုင်ဆန်ခါနဲ့ တိုက်ပြီး စွပ်ပြုတ်အိုးထဲကို ထည့်ရပါမယ်။

    ထည့်ပြီး အိုးကို နောက်တစ်ခါ ဆူအောင် တည်လိုက်ပြီးရင်တော့ dago-jiru ဂျုံလုံးစွပ်ပြုတ်ဟင်း ကျက်သွားပါပြီ။ ပန်းကန်လုံး ထဲကိုထည့်ပြီး လှီးထားတဲ့ကြက်သွန်မြိတ်တွေကို ဖြူးလိုက်ရင်တော့ စားလို့ရပါပြီ။

ကမာကောင်ကြော်

ဒီအစီအစဉ်မှာ ဂျပန်လို “kaki furai” လို့ခေါ်တဲ့ ကမာကောင်ကြော် ချက်ကြပါမယ်။

ယိုရှိုးကု လို့ခေါ်တဲ့ အနောက်တိုင်းအစားအစာ အရိပ်အငွေ့ လွှမ်းမိုးနေတဲ့ လူကြိုက်များတဲ့ ကမာကောင် အကြွပ်ကြော်ကို အတူ ပြင်ဆင်ချက်ပြုတ် ကြရအောင်။

ကမာကောင် (Oyster)

အခုရာသီချိန်ထွက်ဖြစ်တဲ့ ကမာကောင်ကို ပေါင်မုန့် အခြောက်မုန့်ကပ်ပြီး ဆီအိုးထဲမှာ ကြွပ်နေအောင် ကြော်ထားပါတယ်။ အဲဒီကမာကြော်ကို တို့စားဖို့ တာာတာဆော့စ် ဘယ်လို လုပ်သလဲဆိုတာကိုပါ တင်ဆက်ပေးမှာပါ။


၄ ယောက်စာအတွက်လိုအပ်သောပစ္စည်းများ

  • အခွံခွာပြီးသား ကမာကောင် ၁၆ ကောင်
  • ဆားအနည်းငယ်
  • ငရုပ်ကောင်းအနည်းငယ်
  • ကြက်ဥ ၁ လုံး
  • ဂျုံအနည်းငယ်
  • ပေါင်မုန့်ခြောက်မှုန့် အနည်းငယ်
  • အကြော်ဆီ အနည်းငယ်
  • ဂေါ်ဖီ ၁၀၀ ဂရမ် (၆ ကျပ်သား)
  • သံပုရာရည် အနည်းငယ်
  • Worcester ဆော့စ် အနည်းငယ် 

Time needed: 30 minutes.

ကြိုတင်ပြင်ဆင်ရန်

  1. တာတာဆော့စ်ကို အရင်ဆုံး လုပ်ပါမယ်။

    အနီရောင်ကြက်သွန်နဲ့ သခွားသီးကို နုပ်နုပ်စင်းထားပါ။ ရေစ ဆူတော့မှ ကြက်ဥထည့်ပါ။ ကြက်ဥ မကျက်တကျက် ပြုတ်ဖို့အတွက်ဆိုရင် ရေနွေးဆူလာမှ ကြက်ဥထည့်ပြီး ၁၂ မိနစ်၊ ၁၃ မိနစ်လောက် ပြုတ်ရင် ရပါတယ်။ ပြီးရင် ကြက်ဥကို အခွံခွာ၊ ကြက်ဥ အနှစ်နဲ့ အကာကို သီးသန့်ခွဲထားပါ။ ကြက်ဥ အကာအဖြူကို နုပ်နုပ်စင်းထား၊ အနှစ်ကိုလည်း အဲဒီလို လုပ်ထားပါ။

  2. ဆော့စ်ကို နှံ့အောင် မွှေပေးရပါမယ်။

    ပြီးရင် မယောနိစ် ထည့်ထားတဲ့ ပန်းကန်လုံးထဲကို နုပ်နုပ်စင်းလှီးထားတဲ့ ပါဝင်ပစ္စည်းအားလုံးကို ထည့်လိုက်ပြီး မွှေပါ။ ပြီးရင် ဆား တစ်ပွင့် နှစ်ပွင့်လောက်နဲ့ ငရုပ်ကောင်း နည်းနည်းစီ ထည့်ပါ။

  3. ဂေါ်ဖီလှီးပါမယ်။

    ဂေါ်ဖီကို ၅ စင်တီမီတာလောက်လေးတွေ ပါးပါးရိတ်ရိတ်ကလေး လှီးပါမယ်။ အရင်ဆုံး ဂေါ်ဖီရွက်တွေရဲ့ ရွက်ကြောတစ်လျှောက်ကို ကန့်လန့်ဖြတ်လှီးလိုက်ပြီး ၅စင်တီမီတာ ထောင့်မှန်စတုဂံပုံ အပိုင်းလေးတွေ လှီးလိုက်ပါ။ ပြီးရင် အဲဒီ ထောင့်မှန်စတုဂံပုံ လှီးထားတဲ့ ဂေါ်ဖီ အလွှာချပ်လေးတွေကို ၃ စင်တီမီတာထိ ဆင့်ထပ်လိုက်ပြီး တစ်ဖက်တည်းကနေ တတ်နိုင်သလောက် ဖြည်းဖြည်းနဲ့ ရိတ်ရိတ်လေးတွေ လှီးရပါမယ်။

  4. ရေစိမ်ထားပါ။

    ပြီးရင် အဲဒီဂေါ်ဖီမျှင်မျှင်လေးတွေကို ရေအေးထည့်ထားတဲ့ ဇလုံထဲမှာ စိမ်ထားပါ။ ကြွပ်ကြွပ် တောင့်တောင့်လေးတွေ ဖြစ်လာပြီဆိုရင် ဆန်ခါထဲ ထည့်ပြီး ရေတွေကို စစ်ထုတ်လိုက်ပါ။ သံပုရာသီးကို စိပ်ထားပါ။

  5. ကမာကောင်လေးတွေကို ဆေးပါ။

    ကမာကောင်တွေရဲ့ အရသာ မပျက်အောင် ဆား လက်ဖက်ရည်ဇွန်း ၂ ဇွန်းထည့်ထားတဲ့ ရေ ၁ လီတာထဲမှာ ကမာကောင်တွေကို ဆေးပါ။ ရေထဲမှာ ကမာကောင်တွေကို ဖွဖွလေး ဆေးပါ။ အခွံမာတဲ့ ကမာကောင်တွေ ရှိနေသေးရင် ဂရုတစိုက် ဖယ်ထုတ်ပါ။

  6. ကမာကောင်လေးတွေကို ဆားထည့်ပါ။

    ပြီးရင် ဆန်ခါထဲမှာ ကမာကောင်တွေကို ရေစစ်လိုက်ပါ။ အဲဒီနောက် စက္ကူတစ်ရှူးတစ်ရွက်ပေါ်မှာ ကမာကောင်တွေကို တင်လိုက်ပါ။ နောက်စက္ကူတစ်ရွက်ကို အဲဒီကမာကောင်တွေပေါ်ကို ထပ်တင်လိုက်ပြီး အစိုဓာတ်တွေကို စုပ်ယူလိုက်ပါ။ ပြီးရင် ကမာကောင်တွေပေါ်ကို ငရုပ်ကောင်းနည်းနည်း ဖြူးထားပါ။

  7. ဂျုံမှုန့်လူးပါ။

    အဲဒီနောက် ကမာကောင်ကို ဖြူးဖို့အတွက် ဂျုံ၊ ကြက်ဥနဲ့ ပေါင်မုန့်ခြောက်အမှုန့် အသီးသီးကို ပန်းကန်လုံးတွေ ဒါမှမဟုတ် လင်ပန်းတွေထဲမှာ ထည့်ပြီး ပြင်ဆင်ထားပါ။ အရင်ဆုံး ပန်းကန်လုံးအသေးတစ်လုံးထဲမှာ ကြက်ဥတစ်လုံးကို ဖောက်ထည့်၊ ရေစားပွဲဇွန်းတစ်ဇွန်း ထပ်ထည့်ပြီး သမအောင် မွှေထားပါ။ ပြီးရင် ကမာကောင်တွေကို တစ်ကောင်ပြီးတစ်ကောင် ဂျုံမှုန့်ထဲမှာ လူးလိုက်ပါ။ ကမာကောင် အနားသားလေးတွေအထိ ဂျုံမှုန့်တွေ ကပ်နေအောင် သေချာ လူးပါ။

  8. ပေါင်မုန့်ခြောက်မှုန့် ကပ်ပါ။

    ပြီးရင် ခေါက်ထားတဲ့ ကြက်ဥထဲမှာ ဂျုံမှုန့်လူးထားတဲ့ ကမာကောင်တွေကို နှစ်လိုက်ပြီး လင်ဗန်းထဲမှာ ဖြန့်ခင်းထားတဲ့ ပေါင်မုန့်ခြောက်မှုန့်ပေါ်မှာ တစ်ကောင်ပြီးတစ်ကောင် စီပြီး တင်လိုက်ပါ။ ပြီးရင် ကမာကောင်တွေအားလုံးကို ပေါင်မုန့်ခြောက်မှုန့်တွေ နှံ့နေအောင် သေချာ လူးပါ။

  9. ကြော်မည်။

    ဒယ်အိုးထဲမှာ ဆီအများကြီးထည့်ပြီး အပူပေးပါ။ ဆီရဲ့ အပူချိန်ကို ၁၇၀ ဒီဂရီ ဆဲလ်ဆီးယက်စ် ကနေ ၁၇၅ ဒီဂရီ ဆဲလ်ဆီးယက်စ် အထိ ပူလာအောင် စောင့်ပါ။ ပေါင်မုန့်ခြောက်မှုန့်ကို ဆီအိုးထဲ ထည့်ကြည့်လို့ ပူစီပေါင်းသေးသေးလေးတွေ ဖြစ်လာပြီဆိုရင် ပေါင်မုန့်ခြောက်မှုန့်ကပ်ထားတဲ့ ကမာကောင်တွေကို တစ်ကောင်ချင်း ထည့်လိုက်ပါ။ တစ်ခါထဲနဲ့ ကမာကောင်တွေအားလုံး ထည့်လိုက်ရင် ဆီအပူချိန် လျော့ကျသွားနိုင်ပါတယ်။ အဲဒါကြောင့် ကမာကောင်တွေကို အများကြီး မထည့်မိဖို့ ဂရုစိုက်ပါ။

  10. ဆီစစ်ပါ။

    ဆီအိုးမျက်နှာပြင်ပေါ်ကို ပေါ်လာပြီး ပူစီဖောင်းတွေလည်း အကြီးကြီးတွေ ဖြစ်လာပြီ၊ ရွှေညိုရောင်လည်းပြောင်းလာပြီဆိုရင် ဆီအိုးထဲကနေ ကမာကောင်ကြော်တွေကို ဆယ်ယူလိုက်ပါ။ ကမာကောင်တွေကို ဆယ်ယူပြီးရင် ပိုနေတဲ့ ဆီတွေကို စစ်ထားပြီး ကမာကောင်ကြော်တွေကို စက္ကူတစ်ရှူးခင်းထားတဲ့ လင်ပန်းထဲမှာ စီထည့်လိုက်ပါ။

  11. သုံးဆောင်နိုင်ပါပြီ။

    ခါကိ ဖူရာ့အိ လို့ခေါ်တဲ့ ကမာကောင်ကြော် ၄ ကောင်ကို စီစီရီရီလေးထည့်ပြီး ဂေါ်ဖီနဲ့ သံပရာသီးကို ဘေးဘက်မှာ ထည့်လိုက်ပါမယ်။ တာတာဆော့စ်နဲ့ Worcester ဆော့စ်ကိုလည်း သီးသန့် ပန်းကန်လုံး သေးသေးတွေနဲ့ ထည့်ပြီး ခါကိဖူရာ့အိနဲ့ တွဲဖက် စားသုံးနိုင်ပါတယ်။